Gənclər və İdman Nazirliyində yenə ciddi nöqsanlar

Azərbaycan Respublikası Hesablama Palatasının növbəti Kollegiya iclası keçirilib.

Supersport.Az xəbər verir ki, iclasın birinci hissəsində 2025-ci ilin İş Planına uyğun olaraq həyata keçirilmiş tabeliyindəki olimpiya idman kompleksləri vasitəsilə Azərbaycan Respublikasının Gənclər və İdman Nazirliyinin idmanın inkişafı istiqamətində fəaliyyətinin auditinin nəticələri Hesablama Palatasının auditoru Vəfa Mütəllimova tərəfindən təqdim edilib.

Müzakirələrdə Azərbaycan Respublikasının Gənclər və İdman Nazirliyinin şöbə müdirləri və digər məsul şəxs iştirak ediblər. Qeyd olunub ki, auditin nəticələri fəaliyyətin təkmilləşdirilməsinə töhfə verəcək, həmçinin Hesablama Palatasının təklif və tövsiyələri nəzərə alınacaq.

Müzakirələrin yekununda auditor hesabatının təsdiq edilməsi, aşkar edilmiş nöqsanların aradan qaldırılması məqsədilə audit olunan qurum tərəfindən zəruri tədbirlərin görülməsi barədə qərar qəbul olunub.

İclasın ikinci hissəsində 2026-cı ilin İş Planına əsasən bir nəzarət tədbirinin başlanılması ilə bağlı proqram müzakirə edilərək təsdiqlənib.

Nazirlikdə dəfələrlə maliyyə fırıldaqları aşkar, xəbərdarlıq edilib. Lakin indiyə kimi gənclər və idman naziri Fərid Qayıbovun rəhbərlik etdiyi qurum saxtakarlığa davam edib.

Hesablama Palatası bu dəfə Fərid Qayıbovun kadrlarını iclasa çağırmaq məcburiyyətində qalıb və onlar sorğu-sual olunub, iradlar bildirilib.